முற்றுப் புள்ளி

ஆச்சர்யக்குறி (!)

குனிந்து பார்த்தது (?)

கால்களின் அடியில்

முற்றுப்புள்ளி (.)

--------------------------------------------------------------------------------------------------

இக்கவிதையில் நான் ஒளிய வைத்திருக்கும் கருத்தை விளக்கி விடுகிறேன்.

ஆச்சர்யக்குறி என்பது கர்வம் என்ற உணர்வைக் குறிக்கும். கர்வம் கொண்டவன் தலை உயர்த்தி நிற்கிறான்.

கேள்விக்குறியோ தேடலைக் குறிக்கும். தேடல் உள்ளவன் குனிந்து தேடுகிறான்.

முடிவு என்னும் முற்றுப் புள்ளி, ஆச்சர்யக் குறிக்கு கீழேயும், கேள்விக்குறிக்கு கீழேயும் இருக்கத்தான் செய்கிறது. அனைவரின் முடிவும் அவரவர் காலடிக்குக் கீழேயே இருக்கிறது..

தேடலில் இருக்கும், குனிய யோசிக்காத மனிதனுக்கு அந்த முடிவு தெரிகிறது. ஆனால் கர்வத்தில் தலை உயர்த்தி நிற்கும் மனிதனுக்கு தன் முடிவு தன் கால்களுக்கு அடியிலே இருப்பது தெரிவதில்லை.

முற்றுப் புள்ளி என்பதை மரணம், இறைவன் என்று எப்படி உருவகப்படுத்தினாலும் இந்தக் கவிதை பொருந்தும்.

இன்னொரு பார்வையில் சொல்லப் போனால்

உணர்வுகள் தேடினால் அதனிலேயே கிட்டும் தேடப்படும் பொருள்

பத்து!!!

பத்திலொன்று நூலெடுக்க
பத்திலொன்று நிலைப்படுத்த
பத்திலொன்று வெளியெடுக்க
பத்திலொன்று வெளிவர
பத்திலொன்று உள்புகுத்த
பத்திலொன்று தலையெடுக்க
பத்திலொன்று சிலையெடுக்க
பத்திலொன்று களையெடுக்க
பத்திலொன்று மலையெடுக்க
பத்திலொன்று எல்லாம் எடுக்குமோ
பத்துமோ பத்தாதோ
பத்து.

பத்திலொன்று நூலெடுக்க - பத்தில் ஒரு அவதாரமான மச்ச அவதாரத்தில் வேத நூட்களை கடலின் ஆழத்தில் இருந்து மீட்டெடுத்த..

பத்திலொன்று நிலைப்படுத்த - பத்தில் ஒரு அவதாரமான கூர்ம அவதாரத்தில் மந்தார மலையில் சாயாமல் நிலைப்படுத்தி அமிர்தம் எடுக்க உதவிய

பத்திலொன்று வெளியெடுக்க - பத்தில் ஒரு அவதாரமான வராக அவதாரத்தில் கடலடியில் ஒளித்து வைக்கப் பட்ட பூமியை வெளியில் எடுக்க..

பத்திலொன்று வெளிவர பத்தில் ஒரு அவதாரமான நரசிம்ம அவதாரம் தூணைப் பிளந்து வெளிவந்தது

பத்திலொன்று உள்புகுத்த பத்தில் ஒரு அவதாரமான வாமன அவதாரத்தில் மஹாபலியை பூமிக்கடியில் பாதாளத்தில் புகுத்திய

பத்திலொன்று தலையெடுக்க பத்தில் ஒரு அவதாரமான பரசுராம அவதாரத்தில் 21 சத்ரிய வம்சத்தவரை அழித்த

பத்திலொன்று சிலையெடுக்க பத்தில் ஒரு அவதாரமான இராம அவதாரத்தில் வில்லெடுத்த

பத்திலொன்று களையெடுக்க பத்தில் ஒரு அவதாரமான ப்லராம அவதாரத்தில் கலப்பை கொண்டு பல வீணர்களை அழித்த..

பத்திலொன்று மலையெடுக்க பத்தில் ஒரு அவதாரமான கிருஷ்ண அவதாரத்தில் கோவர்த்தன மலையைத் தூக்கிய

பத்திலொன்று எல்லாம் எடுக்குமோ பத்தில் ஒரு அவதாரமான கல்கி அவதாரத்தில் உலகத்தை மஹாபிரளயத்தில் அழிக்க

பத்துமோ பத்தாதோ

பத்து

இந்தப் பத்து அவதாரங்களும் போதுமோ இன்னும் பற்பல அவதாரங்கள் எடுக்க வேண்டிய அவசியம் இருக்குமோ சொல்.

தென்னையும் தென்னவனும்!!!

இயம்புகிறேன் சிவமே
ஓங்கி வளர்வதுண்டு
உச்சியிலே சலசலக்கும் மடலுமுண்டு
தாங்கிய நீருமுண்டு
கட்டி வைத்த விடமும் கண்டத்திலுண்டு
உடலெல்லாம் வரிகளுண்டு
இருக்குமிடம் குளிர்வதுண்டு
விரிசடையுண்டு முக்கண்ணுண்டு
ஓடுமுண்டு உள்ளே வெண்மையுண்டு
காயுலர்த்தாட்டியெடுத்து ஜோதியெரிதலுண்டு
நாரியொருபாதி ஆதலுமுண்டு
நல்குருத்து கண்வழியே பிறத்தலுமுண்டு
நீறுபூசி தொல்லை நீங்குதல் உண்டு
தாள் பணிந்து நீர் வார்த்தார்
பொறுத்திருந்தால் பலனுமுண்டு
தென்னாட்டில் சீருடனே
தென்னையும் தென்னவனும்
ஒன்றெனவே ஒப்பாரே இப்பாரில்.

சங்கத்தமிழ் - இங்க வாழ்க்கை!

புறநானூற்று மருதம்
அகநானூறாய் 
குறிஞ்சியாய் குறிஞ்சி
முல்லை பாலை
நெய்தல்

புறநானூற்று மருதம் - வயல்

அகநானூறாய் - ஊடல் கொண்டது.. அதாவது விளையவில்லை..

குறிஞ்சியாய் குறிஞ்சி - குறிஞ்சி மலர் போல எப்பொழுதாவது கூடல் (குறிஞ்சியின் அகப் பொருள்)

முல்லை பாலை - இருத்தல் - பிரிதல்

நெய்தல் - இரங்குதல்



முதற்பொருள் :

வயல் ஊடல் கொண்டு விளைச்சல் அற்று விட, கூடல் குறிஞ்சியாய் அபூர்வமாய் எப்பொழுதாவது மலர, இருத்தலும், பிரிதலுமாய் இரக்கத்திற்கு ஆளானது வாழ்க்கை.


இரண்டாம் பொருள் :

நெய்தல் - நெய்யப்படுதல்

வயல்கள் ஊடல் கொண்டு விளைச்சல் பொய்த்து விட, அபூர்வமாய் நடக்கும் கூடலானது இருத்தல் பிரிதலான வாழ்க்கையை நெய்துவிடுகின்றது.

புதுமையான புதுக்கவிதை !

இருக்கிறதென்று
இல்லாதது கருதப்படவேண்டி..

வார்த்தை மாலைகளும்
வானவில் கவிதைகளும்
கோடிகோடியாய் கொட்டப்பட்டன...
கடலில்!

கரையோர அலைகளின் ஆர்ப்பரிப்பை
கரகோஷமாய் எண்ணிப்
புளகாங்கிதமாய்!

ஆழ்கடலோ அமைதியாக!!!

--------------------------------------------------------------------------------------------------

வார்த்தை மாலைகளும்

வானவில் கவிதைகளும்

கோடிகோடியாய் கொட்டப்பட்டன...

கடலில்!

கடல் என்பது கடல் அல்ல.. வேறு ஏதோ ஒன்று கடல் மாதிரி..

இருக்கிறதென்று

இல்லாதது கருதப்படவேண்டி..

அதாவது இல்லாத ஒன்று இருக்கிறதென்று தோற்றம் உருவாகும் படி..

கவிதைகள், கதைகள் எழுதிக் குவிக்கப்படுகின்றன.. கடலில்.. எந்தக் கடல்? தமிழ்க் கடலா? இணையக் கடலா? இல்லை காகிதக் கடலா?

கரையோர அலைகளின் ஆர்ப்பரிப்பை

கரகோஷமாய் எண்ணிப்

புளகாங்கிதமாய்!

கரையோரம் இருக்கும் அலைகள் ஆர்ப்பரிக்கின்றன. எதற்கு? கொட்டப்பட்ட கதைகளுக்கு.. அப்படியானால், கடல் என்பது என்ன என மறுபடி ஆராய்வோம்..

இல்லாதது இருக்கிறதென்று பொய்யாய் புனைச்சுருட்டாய் கவிதைகள் கதைகள் கடலில் கொட்டப்பட்டன.. ஆராவாரித்துக் கொண்டு இருக்கும் கரையோர அலைகளைக் கண்டு கடல் பாராட்டுகிறதென்று எண்ணம் கொண்டு!!

ஏன் கவிதைகளைக் கொண்டு போய் கடலில் கொட்ட வேண்டும்? அலையோசையை கரவோசையாய் ஏன் தவறாய் எடுத்தக் கொள்ள வேண்டும்?

அப்படியென்றால் அது என்னக் கடல்? அது என்ன புனைக(வி)தை?

ஆழ்கடலோ அமைதியாக என்பது எதையோ கொட்டி சுட்டிக் காட்டுகிறது..

சொல்லும் புனைக்கதைகளும் கவிதைகளும் கடலில் கரைத்த பெருங்காயம்..

அலைகளும் கைதட்டவில்லை

ஆழ்கடலிலும் மாற்றமில்லை

ஆதலால் பொய்க்கதை புனையாதே

என்று சங்கேதமாய்

உட்கருத்து -- சும்மா ரீல் விட்டுகிட்டே போகாதே.. இங்க யாரும் நம்பலை என்பதா???

வார்த்தை மாலைகள் - வானவில் கவிதைகள்.

என்ன வித்தியாசம் இருக்கு முரணா?

மாலைகள் மற்றவரைப் போற்ற, புகழப் போடப்படுபவை.. ஆக துதிபாடல்கள்..

வானவில் கவிதைகள் - வானவில்லின் குணங்கள் என்ன? அந்நேரத்து அதிசயம், ஒரு நிறப்பிரிகை, அதாவது இருக்கும் ஒரு வெள்ளொளியை (ஏற்கனவே இருக்கும் ஒரு கருத்தை) பிரித்து ஜாலம் காட்டும் சிறு கவிதைகள்.. அதாவது வசீகர வார்த்தைகள்..போட்டு ஏற்கனவே இருப்பதை மேக்கப் போட்டு காட்டும் கவிதைகள்.. அதாவது அலங்காரச் சொற்கள்.. அதாவது வாய்ஜாலங்கள்

துதி பாடுவது, வாய்ஜாலங்கள் என ஆயிரக்கணக்காய் வார்த்தைகள் கொட்டப் படுவது அரசியல் மேடைகளில்..

அப்போ ஆராவாரிக்கும் அலைகள், பிரியாணிப் பொட்டலத்திற்கு அழைத்து வரப் பட்ட கூட்டமோ?

ஆழ்கடல் வாக்காளரோ?

அப்போ மேடைப் பேச்சிற்கு கிடைக்கும் கைதட்டல்களும் உண்மையில்லை,

வாக்காளனின் மனமும் ஆழமான அமைதியில்

மேடையில் பொன்னாடை. மாலை, சோடா, வாய்ஜாலம்..

இப்படி அரசியல் பிண்ணனியில் ஒரு அர்த்தம் எடுக்கலாமே!!!

அதுசரி கொஞ்சம் போலிச்சாமியாருக்கும் போகலாமே!!!

இல்லாத சக்திகள் இருக்கிறது எனச் சொல்லி, துதி பாடி, வர்ணஜாலமாய் பாடல்கள் பரப்பி விளம்பரங்கள் செய்து

கூடி வரும் கூட்டத்தின் ஆரவாரம் கண்டு அதை மிகச் சிறந்த பாராட்டாய் எடுத்துக் கொண்டு, தன்னை கடவுளாக, சக்திபடைத்தவராக எண்ணிக் கொண்டு

மிதப்பில் இருப்பவர்களுக்கு..

ஆழ்கடலாய் கடவுள் அமைதியாய் இருப்பது புரிவதில்லை..

இதைக் கவிதை என்று சொல்வதை விட ஒரு ஃப்ரேம் வொர்க் எனச் சொல்லலாம்..

பொய்யை உண்மையாக்க முயற்சி, வீண் ஆடம்பரம், முகஸ்துதி, உண்மை

இந்த நான்கு டொமைன்கள்.. அவற்றிற்கு உள்ள தொடர்புகள்..

இதுவே கவிதையாய் வெளிப்பட்டிருக்கிறது..

உதாரணத்திற்கு ஒரு தலைக் காதல்

அவள் தன்னைக் காதலிக்கிறாள், அவளிடம் காதல் இருக்கிறது என்று இல்லாததை இருப்பதாய் காட்ட,

வார்த்தைகளால், கவிதைகளாய் அவளுக்காய் கோடியாய் கொட்ட

அதைக் கேட்ட நண்பர்கள் பொழுது போக்காய் ரசிக்க, அவன் போலி மயக்கத்தில்.. அந்தப் பெண்ணோ அமைதியாய், இவை எதனாலும் பாதிக்கப் படாமல்..

இதையே இருதலைக் காதலில்லா காதல் என்றால்

தங்களுக்குள் காதல் இருக்கிறது எனக் காட்ட, காதலர்கள்னா அப்படித்தான் இப்படித்தான் என உணர்ச்சி பூர்வமாய் வசனம் பேசிக் கொள்ளும் காதலர்கள்,,. சுற்றி இருக்கும் ஜால்ராக் கூட்டத்தின் கேலிகள் கிண்டல்கள்..

உண்மைக் காதலோ அமைதியாய்.. இவர்களுக்கு மத்தியில் காதலும் இல்லை. நண்பர்களும் இதை ஒரு டைம் பாஸ் என்று அறிந்தே இருக்கிறார்கள்.. காதலும் அலட்டிக் கொள்ளவில்லை..

சும்மா நம்ம வெங்கடாஜலபதியை எடுத்துக் கொள்வோம்..

அவர் கடல்.. கோடிக் கோடியாய் அவருக்கு ஸ்ரீவாரி உண்டியலில் கொட்டவும் தான் செய்கிறார்கள்.. அதைக் கண்டு பக்தர்கள் ஆஹா ஓஹோ என்று ஆரவாரம் செய்யத்தான் செய்கிறார்கள்..

ஆனால் அப்படி கோடிக் கோடியாய் கொண்டு வந்து கொட்டுபவனிடம் பக்தி இருப்பதில்லை அவன் பக்தனாக காட்டிக் கொள்கிறான்..

அவன் கோடிக் கோடியாய் கொட்டியபோது ஆராவாரித்த கூட்டத்திற்கும் உண்மையில் அவன் பக்தி மேல் அக்கறையில்லை..

நம்ம வெங்கடாஜலபதியோ பட்டை நாமத்திற்குப் பின் மறைந்து அமைதியாய் ஆழ்கடலாய்..

ஆக இது ஒரு ஃபிரேம் ஒர்க்,

வெறுமனே ஒரு ஃபிரேம் ஒர்க் போட வேண்டிய அவசியம் என்ன? ஒரு கவிதை ஒன்றுக்கு மேற்பட்டவைகளை குறி வைக்கும் பொழுதோ அல்லது சங்கேதமாய் யாருக்கோ எதையோ சொல்ல நினைக்கும் பொழுதோ மட்டுமே இது போன்ற ஃபிரேம் ஒர்க்குகள் கொடுக்கப் பட்டு விடுகின்றன.. இக்கவிதையின் அடுத்த முனையில் யார் இருக்கிறார்கள் என்பதைப் பொறுத்து கவிதையின் அர்த்தம் வேறுபடுகிறது..

ஆக இந்தக் கவிதை ஒரு ஆவி.. ஆன்மா மட்டுமே!.. எந்தக் கூட்டுக்குள் நுழைகிறதோ அதாக ஆகி விடுகிறது..

சும்மா ஜாலிக்கு டைட்டானிக் கப்பலை கருப் பொருளா எடுத்துக்குவோம்

இது மூழ்கவே மூழ்காது ... பொய்யான உத்திரவாதம்

அதற்காக எத்தனை விளம்பரங்கள்.. கதைகள்..

அதை நம்பினார்களோ இல்லையோ உலகின் மிகச் சொகுசான கப்பலில் பயணம் செய்யும் ஆர்வத்துடனும், முடியாவிட்டாலும் பரவாயில்லை எனப் பார்க்கும் ஆர்வத்துடனும் மக்கள் அலைகளின் ஆரவாரம்..

ஆனால் ஆழ்கடல் அமைதியாக இருந்தது... அதில் ஒரு பனிமலை தன் தலையை சற்றே வெளிக்காட்டியபடி நீச்சல் அடித்துக் கொண்டிருந்தது..

அடுத்த சில நாட்களில் நடந்தது அனைவருக்கும் தெரியும்..

பல நாடோடிப் பாடல்களில் இப்படி சங்கேதமாய் மாமனுக்குச் சேதி சொல்லும் மயில்கள் உண்டு

..

அர்த்தநாரீஸ்வரர்!!

மீரா அவர்களின் அர்த்தநாரீஸ்வரர் கவிதையும், அதற்கான என் பதில் கவிதையும்...


சொந்தங்களின்
சொல்லம்புகள்
சாட்டையாய் சுழல..

பிறந்த மண்ணைவிட்டு
வேற்று மண்ணில்
முகமறியா முகங்களோடு
முகம் தொலைக்க...

பண்பட்ட மனம்
புண்பட்டு நின்றது
சக மனிதர்களின்
விலகல் கண்டு
கோபத்தின் உச்சத்தில்
குழந்தைகள் கூட
கொடியவர்களாய் தெரிய....

திடம் மனதிலும்
வலிமை உடலிலும் இருக்க
தன்மானம் விற்று
கடைகளில்
கையேந்திய பொழுது
கூனிகுறுகிய மனதை
நிமிர்த்த வழியின்றி..

வஞ்சித்த வாழ்வை
வலிகளோடு சுமந்து...

விடையறியா கேள்விகளை
விதியென்று ஏற்பதா??
விடைகாண முயற்சிப்பதா??

அறிந்தும் அறியாமல்
உலகிற்கு இந்த கேள்வி

கடவுளின் கலவை
அர்த்தநாரீஸ்வரராய்
கௌரவிக்கபடுமானால்..

அவன் படைத்த
எங்களின்
நிலை மட்டும்
காட்சி பொருளோ??????????
__________________ மீரா

திருமங்கை மகனு(ளு)க்கு தாயின் ஆறுதல்...பதில் கவிதை!!!

நீயாய் நீயிருக்க
தீயாய் ஊரிருக்க
தாயாய் இருப்பதாரோ
தங்க மகளே!

தட்டிய கையொலி
காதில் விழும்பொழுதெல்லாம்
நெஞ்சில் இறங்குதடி
இடி

உன் நளினம் கண்டபோது
என் நளினமும் நாணமும்
தொலைத்து விட்டேன்
சுமந்த வயிறு
சுமந்த மனது
உன்னைப் பிரசவித்த பொழுது
லேசானது
நீ பரிதவித்த போது
கனத்தது

உணர்வையும் உடலையும்
இடம் மாற்றி வைத்துவிட்டு
என்ன விளையாட்டு இது
அந்த பிரம்மனும் தான்
குடித்திருந்தானோ
உன் அப்பனைப் போல்

பாவியடி நான் மகளே!
நள்ளிரவில் விட்டுச் சென்றாய்
நாடோடியாக
இங்கே தாயை விட்டு விட்டு
உலகெல்லாம் யாரையடி தேடுகிறாய்
வா மகளே
என்கட்டை மண்ணில் சாயும்வரை
உழைத்துத் தருகிறேன்
என் பாலருந்தி வளர்ந்தவளே
பால் மயக்கத்துடன்
பரிதவித்துச் சென்றவளே
உண்டு நமக்கும்
இருகைகள்
ஒரு வாழ்வு
வா.

....

நிலவுக்குப் போகலாம் வாருங்கள் !!!

லெனின் ராம் அவர்கள் எழுதிய நிலவிற்குப் போகலாம் வாங்க கவிதை:

பயணத்திற்கு முன் சில பயனுள்ள அறிவிப்பு:
---------------------------------------
-நிலவில் காற்று & நீர் கிடையாது. ஆக, நிலவில் (காற்று இல்லாத இடத்தில்) மனிதனுக்குக் காது கேட்காது.
-பூமியின் நிழல், நிலவின் மீது படுவதால் தான், வளர் பிறையும், தேய்பிறையும் நடக்கின்றன.
-சூரிய குடும்பத்தில் தற்பொழுது 8 கோள்கள் தான் இருக்கின்றன. புளுட்டோவை கோள் வரிசையிலிருந்து நீக்கிவிட்டார்கள்.
-ஒரு பொருளின் எடை 1/6 தான் நிலவில் இருக்கும். அதாவது, பூமியில் 60 கிலோ, நிலவில் 10 கிலோ தான்.

பயணியுங்கள் இப்போது:
---------------------

முந்தாநாள் வரை முழுக்கறுப்பு - அமாவாசையாய்!
பதினைந்தே நாளில் பளபளப்பு - பவுர்ணமியாய்!
நிலவே, என்ன முகப்பசை உபயோகிக்கிறாய்?

எந்த முட்டாள் பயல்,
மொத்த மாவையும் ஒன்றாய் சேர்த்து, ஓரேஒரு லட்டு செய்து
அதையும் எல்லோருக்கும் எட்டாத தூரத்தில் தூக்கி எறிந்தவன்?

நிலவே,சொல்வதைக் கேள்!
எத்தனை முறை உலகத்தைச் சுற்றினாலும் உனக்குக் கிடைக்காது.
யானைமுகன் அந்த ஞானப்பழத்தை எப்போதோ சாப்பிட்டுவிட்டான்!

நாங்கள் உன்மேல் காலடி வைத்ததும் கத்தினாயா?
மன்னித்து விடு!
காற்றில்லா இடத்தில் மனிதனுக்கு காது கேட்காது!

உனக்கு கொஞ்சம் கூட அறிவு இல்லையா?
உன்னுடம்பை தானே கொஞ்சம் கொஞ்சமாய்
நின்று நிதானமாய் தன் நிழல் வாயின் மூலம்
தின்று தீர்க்கிறது, இந்த திமிர் பிடித்த பூமி!
பிறகு ஏன் இதையே சுற்றிச்சுற்றி வருகிறாய்?

என்னது?
மனிதன் ஏதாவது தருவான் என்றா
உடல் தேய்ந்தாலும் பரவாயில்லை என்று
உலகத்தைச் சுற்றுகிறாய்?
அடப்பாவமே!
இவன் எச்சில் கையால் கூட காக்காய் விரட்டமாட்டான்!
உன்னிடம் வந்த பின்பும், அள்ளாமல் இருக்கிறானே!
அதற்கு ஆனந்தப் படு!

குருதி பாயும் இதயம் இருந்தும் இங்கே அரக்க குணம்!
ஈரமே இல்லாத உனக்கு எப்படித் தான் இவ்வளவு இரக்க குணமோ?
மனிதன் உதவி கேட்காமலேயே, ஒளி கொடுக்கிறாயே!

ஆம். நீ சொல்வது சரி தான்!
குடிகாரன் தான் அந்தக் கதிரவன்!
சாயங்காலம் ஆனால் போதும்,
சாராயம் குடித்துவிட்டு எங்கு போய் சாய்கிறானோ?
ஏதோ, நீ கொடுக்கும் வெளிச்சத்தில் தான்
பூமி பாதை மாறாமல் பயணிக்கிறதோ?

சரி, இரவில் உன் வீட்டில் தங்குகிறான் சூரியன் என்கிறாய்.
பகலில் எங்கு போய்கிறான் தெரியுமா, உன் ஏகபத்தினி விரதன்?
உன் சகக்கழுத்தி* பூமியோடு சந்தோஷமாய் இருக்கிறான்.
பொறு!
நீ கோபப்படுவதற்கு முன் இன்னும் கொஞ்சம் சொல்லிவிடுகிறேன்.
உன்னைச் சேர்க்காமல், எங்களுக்குத் தெரிந்தே அவனுக்கு எட்டு மனைவிகள்!
இதை மானிடன் நான் ஏன் உன்னிடம் சொல்ல வேண்டும் என்கிறாயா?
அடுத்தவனைப் போட்டுக் கொடுப்பதில் எங்களுக்கு அலாதி சுகம்!

'உடற்பயிற்சி செய்யாமலேயே உடல்எடை குறைக்கலாம் வாருங்கள்'
என்று விளம்பரம் கொடுத்து எங்களை வலைக்கப் பார்க்கிறாயா?
முதலில் நீராலும், காற்றாலும் உன்னை நிரப்பு!
பிறகு பார்!
கோடை விடுமுறைக்கு குடும்பத்தோடு வந்து கும்மாளம் அடிக்கிறோம்!


*சகக்கழுத்தி - சக்காளத்தி (நடைமுறைத் தமிழில்), ஒன்றிற்கு மேற்பட்ட தாரங்கள் (உரைநடை தமிழில்)

இப்பொழுது லாவணியாக அல்லிராணி எழுதிய பதிலுக்குப் பதில் :

முந்தாநாள் வரை முழுக்கறுப்பு - அமாவாசையாய்!
பதினைந்தே நாளில் பளபளப்பு - பவுர்ணமியாய்!
நிலவே, என்ன முகப்பசை உபயோகிக்கிறாய்?

எனக்கு மேக்கப் போடவும் கலைக்கவுமே நேரம் சரியாக இருக்கிறது...
ஒரு நாள் ஜொலிக்க 14 நாட்கள் மேக்கப், 14 நாட்கள் கலைப்பு..யாரோ கமலாமே 5 மணி நேரம் மேக்கப் போடுவதாகச் சொல்கிறீர்களாமே.. அவரெல்லாம் என் முன் தூசு.

எந்த முட்டாள் பயல்,
மொத்த மாவையும் ஒன்றாய் சேர்த்து, ஓரேஒரு லட்டு செய்து
அதையும் எல்லோருக்கும் எட்டாத தூரத்தில் தூக்கி எறிந்தவன்?

எந்த புத்திசாலி வானத்தில் வைத்த அந்த லட்டை மெதுவாய் மெதுவாய் கபளீகரம் செய்தது??? தின்பதாவ்து சிந்தாமல் தின்றானா? நட்சத்திரமாய் சிதறச் சிதற..

நிலவே,சொல்வதைக் கேள்!
எத்தனை முறை உலகத்தைச் சுற்றினாலும் உனக்குக் கிடைக்காது.
யானைமுகன் அந்த ஞானப்பழத்தை எப்போதோ சாப்பிட்டுவிட்டான்!

பழம் போனால் போகட்டும்.. கொட்டையாவது கிடைக்குமா என்றுதான்...

நாங்கள் உன்மேல் காலடி வைத்ததும் கத்தினாயா?
மன்னித்து விடு!
காற்றில்லா இடத்தில் மனிதனுக்கு காது கேட்காது!

நான் கத்தவில்லை.. உன் ஷூ நாத்தம் தாங்காமல் தூ எனத் துப்பினேன்.. நீ புழுதி என துடைத்து விட்டுக் கொண்டாயே..

உனக்கு கொஞ்சம் கூட அறிவு இல்லையா?
உன்னுடம்பை தானே கொஞ்சம் கொஞ்சமாய்
நின்று நிதானமாய் தன் நிழல் வாயின் மூலம்
தின்று தீர்க்கிறது, இந்த திமிர் பிடித்த பூமி!
பிறகு ஏன் இதையே சுற்றிச்சுற்றி வருகிறாய்?

பழிக்குப் பழி வாங்கத்தான்.. சூரியனை மறைத்து கிரகணம் என்று கிறுக்குப் பிடிக்க வைத்ததை மறந்தாயோ???

என்னது?
மனிதன் ஏதாவது தருவான் என்றா
உடல் தேய்ந்தாலும் பரவாயில்லை என்று
உலகத்தைச் சுற்றுகிறாய்?
அடப்பாவமே!
இவன் எச்சில் கையால் கூட காக்காய் விரட்டமாட்டான்!
உன்னிடம் வந்த பின்பும், அள்ளாமல் இருக்கிறானே!
அதற்கு ஆனந்தப் படு!

மனிதன் தரமாட்டான் என்று உறுதியாய் தெரியும்.. திரும்ப வரமாட்டான் என்று உறுதியில்லையே! அள்ளி வந்தானே ஆர்ம்ஸ்ட்ராங்.. சந்திரப்புழுதி... மனிதனுக்காக ஒளி தரவில்லை..

குருதி பாயும் இதயம் இருந்தும் இங்கே அரக்க குணம்!
ஈரமே இல்லாத உனக்கு எப்படித் தான் இவ்வளவு இரக்க குணமோ?
மனிதன் உதவி கேட்காமலேயே, ஒளி கொடுக்கிறாயே!

பாவம் சிற்றுயிர்கள் இவன் டார்ச் டார்ச்சரில் தாங்காதே எனத் தான்.. இதமான ஒளி.. ரத்தம் பாய்வதால்தான் ரத்த வெறி.. நான் பற்றற்றவன் எதையும் அதிகம் கவரமாட்டேன்..(நிலவிற்கு ஈர்ப்பு விசை குறைவு)
குருதி பாய்வதால்தானே இரத்த வெறி..

ஆம். நீ சொல்வது சரி தான்!
குடிகாரன் தான் அந்தக் கதிரவன்!
சாயங்காலம் ஆனால் போதும்,
சாராயம் குடித்துவிட்டு எங்கு போய் சாய்கிறானோ?
ஏதோ, நீ கொடுக்கும் வெளிச்சத்தில் தான்
பூமி பாதை மாறாமல் பயணிக்கிறதோ?

சரி, இரவில் உன் வீட்டில் தங்குகிறான் சூரியன் என்கிறாய்.
பகலில் எங்கு போய்கிறான் தெரியுமா, உன் ஏகபத்தினி விரதன்?
உன் சகக்கழுத்தி* பூமியோடு சந்தோஷமாய் இருக்கிறான்.
பொறு!
நீ கோபப்படுவதற்கு முன் இன்னும் கொஞ்சம் சொல்லிவிடுகிறேன்.
உன்னைச் சேர்க்காமல், எங்களுக்குத் தெரிந்தே அவனுக்கு எட்டு மனைவிகள்!
இதை மானிடன் நான் ஏன் உன்னிடம் சொல்ல வேண்டும் என்கிறாயா?
அடுத்தவனைப் போட்டுக் கொடுப்பதில் எங்களுக்கு அலாதி சுகம்!'

கதிரவன் என் கணவனல்ல.. எனக்கு கடன் கொடுத்தவன்.. வசூலுக்காக அவன் துரத்த நான் ஓட அவன் அருகில் வர நான் மறைய.. இதெல்லாம் நான் சொல்லி உனக்கு விளங்க வேண்டுமா?

அவன் குடித்து விட்டு சாய்வதில்லை.. என்னைத் தேடித்தேடி பைத்தியமாய் உலகெங்கும் வலம் வருகிறான்..


அவன் என்னைத் தேடி முகம் சிவக்க கோபத்துடன் அலைவதை பார்த்து விஜய்காந்தைக் கண்ட ஜெயலலிதா போல் குடிகாரன் என்றீர்களே.. போங்கள் பொல்லாத ஆளு நீங்கள்...

பூமி கூடத் தள்ளாடுகிறது புரியுமா உங்களுக்கு (Wobling in the Axis)..
தள்ளாட்டதில் இருந்தால் தள்ளாட்டம் தெரியவா போகிறது?? (ஐன்ஸ்டீனின் சார்பியல் கொள்கை)

சகக் கழுத்தி அல்ல சகக் கிழத்தி (கிழத்தி - மனைவி)..
எல்லாம் ஒரு போங்குதான்.. பூமியை நான் சுற்ற பூமி என்னைப் பார்க்க ஆசைப்பட்டு சுற்றிசுற்றி என்னோடு இணைந்து சூரியனைச் சுற்ற இதை அந்த எட்டுப்பேரும் சுற்றி சுற்றி வேடிக்கைப் பார்க்க.. சூரியன் தலைசுற்றி பால்வீதியில் பம்பரமாய் சுற்றி கருந்துளை நோக்கி நகர.. கருந்துளையும் சுற்றிச் சுற்றி அணுவைப் பிளந்து தன்னுள் அடக்க...
ஒளி வெள்ளத்திற்குப் பின் இப்படி ஒரு இருட்டான சரித்திரம் இயங்கிக் கொண்டிருக்கிறது.. வாயைப் பிளந்து கொண்டு பார்க்காதே உள்ளே ஈ சுற்றிச் சுற்றி வருகிறது...

உடற்பயிற்சி செய்யாமலேயே உடல்எடை குறைக்கலாம் வாருங்கள்'
என்று விளம்பரம் கொடுத்து எங்களை வலைக்கப் பார்க்கிறாயா?
முதலில் நீராலும், காற்றாலும் உன்னை நிரப்பு!
பிறகு பார்!
கோடை விடுமுறைக்கு குடும்பத்தோடு வந்து கும்மாளம் அடிக்கிறோம்!

நீரும் வேண்டாம் நீரும் வேண்டாம்.. காற்றும் வேண்டாம் உங்கள் கழிவுகளும் வேண்டாம்.. நான் சலனமின்றி வாழ்கிறேன்.

..

கன்னத்தில் முத்தம்

கன்னத்தில்
அவள் உதடுகள்
எழுதிய
காதல் வரிகள்
தாடி.....

அவளின்
உமிழ் நீர் கூட
உரமானது!

அவன் கன்னத்தில்
தாடி
அமோக விளைச்சல்

நானும் தானே
முத்தங்கள் இட்டேன்
நிலம் தரிசா
இல்லை
உரம் பழுதா

உரம் பழுதில்லை
கண்ணீர் என்னும்
உவர் நீர்
வெள்ளம் புகுந்து
நிலம் தான்
தரிசாய்...

கண்ணீரே கண்ணீரே
கரைத்தீரே உப்புகள்
உப்பிட்டவரை
உங்களால்
கரைத்துவிட முடியுமா?

உப்பிட்டவர் = பெற்றோர்

கண்ணீரில்
சில நேரம் கரைந்தது
உப்பிட்டவரின்
மனம்.
சில நேரம்
மானம்...

சொற்சிலம்பம் - பாகம் 3

இரவில் விழித்திருந்தேன் .... !
இரவல் விழி திறந்தேன்.... !


முதல் வரி ..... before operation
இரண்டாம் வரி... after operation... !

-----சாம்பவி

விழி இறக்காதவரை,
விழி இருக்கும்வரை,
விழித்து இருக்கலாம்...

விழிநிலையுணர்ந்து
இரவில் விழித்திருந்தால்,
இரவல் விழி தேவையில்லை...

-----அக்னி

இரவல் பெற்றால் திரும்பத் தர வேண்டும்
இரவிலும் இரவலும் திறந்த விழி
இருந்துமா இல்லை திறந்த வழி?

மூடா விழி, விழித்தாலும் தேடா வழி...
ஆனால்,
மொழி தேடி மூடா விழி.., மூடா விழியல்ல...
தீரா தமிழ் மொழி தேடும் வழி...

-----அக்னி

கண்ணப்பன்
கண்ணப்ப
கண்ணப்பரானாரோ.. .!

----சாம்பவி

முக்கண்ணனுக்கு
முதல்கண்
கண்ணப்பன் தந்தது
இரண்டாம் கண்
செருப்படி பட்டது
மூன்றாம் கண்ணோ
மூடிக்கிடந்தது

என்னப்பர்
என்னையப்ப
என்னப்பனானாரோ..
சும்மா...சும்மா....

----அமரன்

சும்மா சும்மா சும்மாடு தாங்கி
சின்ன சின்ன சிறுவாடு சேர்க்க*...
அப்பனவனப்பியதென் சிறுவாடு
ஆச்சுதவன் சைட்டிஷ்ஷுக்காய் கருவாடு.... !

----சாம்பவி

அப்பனவன் சிறுவாடு சேர்க்க
அப்பியவன் கருவாடு கேட்க
தப்புமா இரவோடு
தந்திடுமோ திருவோடு!

திருவோடு திரு, நீர் இருக்க*
திருவோடு நானேனேந்த....!
திருவோடும் திருநீரும்
திருவாளருக்கே..... !
மீனாட்சி திருவாளருக்கே.... !

-----சாம்பவி

திரு(லஷ்மி)வோடு இருந்தவர் படுத்துக் கிடக்க
திருவோடு ஏந்தி அலைந்தார் இன்னொருவர்
திருவும் திருத்திருமோ
திருத்திருவும் திரிந்திடுமோ
திருவும் ஓட
திருவோடு தானும் ஓட
அன்னம் பூரணமாக்கி
அம்மையானாள் அப்பனுக்கு!

திருதிருன்னு இத்தனை திரு...
சந்தேகமேயில்லை...
"திரு"வாளரே தான்....


உள்ளப்படி உள்ளபடி
உள்ளப் படியில் உள்ளபடியே
கொலுவிருக்கும் பதிக்குப்
படியளக்க எதற்கிப்படி
மண்டகப்படி... !

மண்டகப்படி........... உற்சவ மூர்த்தியை, மண்டபத்திற்கு அழைத்து வரும் வைபவம்.... வேறே எதுக்கு பூசைக்கு தான்.... அப்பா வைதாலும் பூசை தான்.....

ஆக... மண்டகப்படி.... வைதல் − ஒன்றுமில்லாததுக்கெல்லாம் தையா தக்கானு குதிக்கறதும் மண்டகப்படி தான்.... ராத்திரி முழுக்க தூங்காம இப்படி மன்றத்துல உக்கார்ந்திருந்தா மறுநாள் நடக்கறதும் மண்டகப்படி தான்... உங்க வீட்டுல தினமும் நடக்குமே... அதே அதே... .... அதே தான் ஐயா....

----சாம்பவி

மண்டு அகப் படியில்
காத்திருப்பாளென்றுதான்
மண்டகப்படி

மண்டூகம்....
மண்டும் அகம்....
மண்டகப்படி
சர்வ நிச்சயம் .... !

----சாம்பவி

மண்டு(டின்) ஊகம் சரியல்ல
மண்டு அகப் படி இருந்தாலும்
(படி)அளப்பவன் பரமனல்லோ!

படி அளப்பவனுக்கும்
படிய*ளப்பவளுக்கு.....
படியாதிருந்தால் எப்படி....

-----சாம்பவி

படி அளத்தல் எமக்கெளிது
அதனிலும் எளிது
வெறுமனே அளத்தல் (அதனாலேயே படிக்கு பிராக்கெட் போட்டேன்)

படியாதிருந்தால் அனலாய் பறக்கும்
படியாதிருந்தால் அனலா பறக்கும்
படித்தோன் படியோன் ஆயின்
படும்படி படுமடி படிப்படி ஆக்கும் பொடிப்பொடி

அகப்படி அடியினில் இல்லை தினப்படி
டிவியடி அவளின் நுகத்தடி

அளப்பதில் மன்னனோ....
அடி பிடி இல்லா படியில் அளக்குறீரே.... !



ஒவர் அளப்பு ஒடம்புக்கு ஆகாதுங்கோ.....

அடியடி... !
பொடி வைத்து நிறுத்துவேன் அடுப்படி... !
அப்புறம்...
மாடிப்படி தான் உங்கள் குடி... !
நிர்கதியாய் உங்கள் கதி... அதோ கதி.... !

----சாம்பவி

அடி முடி தேடி
அளக்க முடியா அரன்
அளப்பதிலென்ன முரண்

அடியில்லை எனச் சொல்லுவோமோ தவறு
பிடியில்லை எனச் சொல்லுவோமா நாம் களிறு
அடியும் பிடியும் அடுப்படியிலே சேர்ந்திருக்க
படித்தேன் அளத்தல் படித்தேன்

பொடியில் தானின்று அடுப்படி
மாடிப்படி குடி பின் பாதிப் படி
பிறமடி குடியேறும் பாதிப்படி
நிர்கதி அதோகதி தெரியுமே உன்சங்கதி

பாதிப்பு எனக்கோ.... !
பதிப்பு நாடி கொதிப்படக்க ( publicize பன்னிடுவேனாக்கும்.... ! )
நாடிக் கொதிப்படங்கி
பாதித்திப்பு தருவீரே....

நல்ல வேளை புதுசா வந்த குடும்ப வன்முறைத் தடுப்புச் சட்டத்தைப் பத்தி தெரியலை.. பிழைத்தேன்.

பா திரும்பாதா எனப்
பார் திரும்பிப் பார்த்திருக்க
பாதி இரும்பா பாதிக் கரும்பா என
இறுக்கமும் இனிமையும் பிணைந்துவர
பாவும் பாவியும் பாவையும் பாவின்
ஊடே ஊடையாய் ஊடலும்
நெய்யும் அணி


---சாம்பவி

தேடியவன் பொய்யுரைக்க...
தேடி அதுவும் பொய்யுரைக்க...
அடிமுடி தெரியாமல் போயிற்று
ஆயின்...
அவளுக்குத் தெரியாமல்
என்ன... அடி... முடி....
அடிமுதல் முடிவரை
அவள் வரை.... !

----சாம்பவி

அவளொரு வரைதான்
வரையறை இல்லா வரை(மலை)
மெட்டியிட்டு அம்மி மிதிக்க அடிகண்டான்
மாலையிட்டு தலைகுனிய முடிகண்டான்

இராப் போழுதில்
குடுமி பிடித்தாட்டி
முடிகண்டான்
இராப்பொழுதில்
கால்பணிந்து
அடிகண்டான்

அவளுக்கிது எளிதாமோ
குடும்பம் கூட்டுக் களிதாமோ!

சொற்சிலம்பம்...- பாகம் 2

மெல்லக் கவியென்று
இவ்விசைகொண்டு விசைப்பலகையொற்றி
ஒத்தி யெடுத்த பிரதிகள்
கவியா இல்லையா?

கவியே தான்
கவிழ்ந்தாலும் கமழ்ந்தாலும்
கவி கவிதான்... !
கரும்பில்
அடிக் கரும்பென்ன
நுனிக்கரும்பென்ன
பாகம் பார்த்து ருசிக்க
பட்டணத்து பட்டினத்தாரா
யாம்... !

-----சாம்பவி

பட்டு இனத்தார் தான்
மெல்ல மெல்ல
இழைபின்னி
கூடுகட்டும்
பட்டினத்தார்தாம்
பட்டும் படாமல்
இருந்தாலும்

பட்டினத்தார் பகட்டுதானே,
பட்டிழைத்த பட்டு...
இழைத்ததைக் கவர்ந்த உழைத்தவன்...
உழைத்தவன் இழைத்த பட்டு... பகட்டு...
ஆனால், படுகின்றது,
இழைத்ததும் உழைத்ததும்...

------அக்னி

பட்டு
பகட்டு
பதினெட்டு
புதுமொட்டு
தொட்டு
பொட்டுடிட்டு
கட்டு
கால்கட்டு

பசியாறுவது பெரும்பாடில்லை
ருசியாறுவது தான் பெரும் பாடு

பட்டு பட்டு தான்
பட்டுப் போனோமே...
பட்டிலென்ன பகட்டு.... !
ஒரு வேளை பசியாற
படும் பாடு பெரும்பாடு....!!
ஒருவேளை ....
ஒரு வேலை கிடைத்தால்
தீர்ந்திடுமோ ....
எம்பாடு... !


கால்கட்டு
போட்டுட்டு
சொல்லிட்டு
போயிட்டு
பொட்டிட்டு நானிருக்க*
விட்டுட்டு போனதெங்கே.... !

-----சாம்பவி

விட்டு (ஹ்யூமர், நகைச்சுவை) போனதடி வாழ்க்கையில்
விட்டுப் போனதடி
உன கால்பிடித்து
மெட்டிப் போட்டேன்
நீயோ உன் காலின் கீழ்
மெட்டிப் (மிதித்துப்) போட்டாய்
தினம் நீ வைக்கும் பொட்டில்
வியர்வையாய் வழிந்த என்
இரத்தத்தின் நிறமுண்டு அறிவாயா?

என் பொட்டில் நீ இருக்க*
பொட்டில் தான் அடித்தனரோ
பொட்டென்று போனீரோ...
என் பொட்டெடுத்துப் போனீரோ... !

கொடி காத்த குமரனின் மனைவியின் புலம்பல் இப்படித்தான் இருந்திருக்குமோ... !

----சாம்பவி

என் பொட்டில் அடித்த அடியில்
பொறி கலங்கிப் போனது
ஆங்கிலேயனுக்குத் தான்

இப்படி அடி பட்டு பட்டு
சிந்தி விழும் இரத்தத்துளிகள்தான்

நாளை
பாரதத் தாயின் முகத்தில்
வெற்றிப் பொட்டு

சுதந்திரம் எனது உயிர்
இன்று என் உயிருக்குச் சுதந்திரம்
நீயும் எனது உயிர்
உனக்கும்தான் சுதந்திரம்


-- கொடி காத்த குமரன் இப்படித்தான் பதில் சொல்லி இருப்பாரோ!!!

அடித்த அடியில்
பொறி கலங்கியது...
ஆங்கிலேயனுக்கு.... !
அடிக்கும் வேகத்தில்
கணிப்பொறியும் கலங்கியது.... !
ஆங்கிலத்தில்.... ! ( buffer overflow).... !!!!

----சாம்பவி

ஆங்கு இலத்தில்(இலவம் பஞ்சு மரம்) காத்த கிளி
ஆங்கிலத்தில் கதைத்த மொழி
தேங்கிப் போய் தொங்கினாலும்
தேனாய்த் தமிழ்

இலவு காத்தது எமாந்தது
கிளி மட்டும் தானா....
உன் வரவு காத்து
நானும் தான்... !
எட்டாக் கனியாய்
வேலை உனக்கு
முட்டாள் கன்னியாய்
நானெதற்கு உனக்கு....

----சாம்பவி

வரவு இல்லை என்பதால்
வசவு வரவென்பதால் தானே
வரவு நின்றது
வேலை எட்டாக்கனி
காயல்லவே!
கனிந்து விழ இன்னும் சிறிது காலம்
இல்லையெனில் நான்
வளர்ந்து பறித்து வர
இன்னும் சில காலம்
மரம் ஏறப் பழகிவர
இன்னும் சில காலம்
காலங்கள் செலவு
கனிகள் வரவு
பொறுமைகள் செலவு
பொன்குவைகள் வரவு

அடிமேல்
அடியெடுத்து
அடி பிசகாது
அடித்ததில்
அடித்தது யோகம்
வெற்றியாக....!!

----- ஓவியன்

யோகம் என்ன உமது மனைவி பெயரா????

அடி - இது முதலடி - என்னிடம் தைரியம் ஒன்றே முதலடி
அடி - இது இரண்டாமடி - இந்தத் துணியை நீ இரண்டா மடி
அடி - இது மூன்றாமடி - பசுவிற்கு நாலா மூன்றா மடி?
அடி - நான்காமடி - இதை எழுதும் நான் காமடி

காமடியாய் நான்காம் அடி
காம நெடியாய் மூன்றாம் அடி
அடிதடியாய் முதலிரண்டடி....
அடி தடியாய் (bold) ஈற்றடி.... (signature) !

---- சாம்பவி

இரண்டா மடி என்றாலே அடிதடியென்றால்
தடித்து கை உப்புமா இல்லை தடித்தது கை ஒப்பமா?

ஆம் ஒப்பவில்லை... !
வாழ்க்கை ஒப்பவில்லை... !
அவன் ...
கை ஒப்ப வில்லை
உடைக்கும் வரை ...

------சாம்பவி

உடைக்கும் எடைக்கும்
அடைக்கும் கதவுகள்
நடைக்கும் படைக்கும்
திறக்கின்றன

அடைக்கத் தானே கதவு
திறக்கத் தானே கோல்... !
கன்னக் கோல் வைத்து
கன்னமிடு.... !
இல்லையேல்........
கன்னத்தில் கை வைத்து
கன்ன விடு.... !
என்னை .........
கன்னியாய் விடு... !

-----சாம்பவி

அடைத்த நெடுங்கதவம்
திறந்ததும் தமிழ்
மீண்டும் அடைத்ததும் தமிழ்
தமிழமிழ்திழமிந்தமிழ்ந்து
கசியும் இதழமிழ்தமிழினால்
கன்னக் கோலின்றி
கன்னத்தில் கன்னமிட்டு
திறப்போம் கனவுக்கதவம்

இதழமிழ்தில்லை.... !
தமிழமிழ்துண்டு.... !
இதழமிழ்துண்ண தடா... !
அமிழ்ந்ததும்பும் தமிழமிழ்துண்ண
நேரங்காலமேதடா... !

----சாம்பவி

நேரங்காலமே தடா...
தமிழமிதுண்ண
இரவில் விழித்திருந்தால்,
இதழமுதுண்ண
நேரங்காலமேதடா..?

----அக்னி

கன்னமிட்டுத் தான் பாரேன்...
கன்னம் இற்று விடும்படி தாரேன்... !
நேற்றுத் தான் வாங்கினேன்
மிதியடி... !
நாளைக்கும் வாங்க வா ....
மீதி அடி... !

---சாம்பவி

இதழும்(பூவிதழ்) தமிழும் அமிழ்தூறி
தாமரையில் ததும்பும் தேன்துளி
அடுக்கடுக்காய் இதழிருக்க
கடுகடுப்பாய் ஏன் இன்னொரு இதழ்?

தமிழ் சுவைக்க தடையாகுமா? வண்டுறங்க மலர் மூடினால் மாமபழத்து வண்டாய் மனதைக் குடையாதோ?

அடிதடி மிதியடி
இன்னுமென்ன மீதியடி?

இன்னும் எட்டடி இருக்குதடா..... ( ஏழடியா எட்டடியா... ?? )
இணையாக எடுத்து வைக்க.... !
பணயமாக பணம் கேட்டால்
இணைய வேண்டாம் போடா போ.... !

-----சாம்பவி

பணயத் தொகை என்பது
பணம் தந்து விடுதலை பெற..
சிறைபட அல்ல.

எட்டி நின்றவளே
ஏழடி என்றால்
ஆறடி இங்கே
அஞ்சு வார்?
நாலும் பார்த்து,
மூன்றும் உணர்ந்து
இரண்டும்
ஒன்றாய் பின் என்ன
ஒன்றுமில்லை நம்மிடையில்

ஒன்றுமில்லை நம்மிடையில்.... !
ஒன்றியிருக்க ஒன்றுமில்லை ... !
ஒன்று இருக்க ஒன்று இல்லாதிருக்க,,,,.
நிதம் ஒரு காரணத்தால்
சிதம்பர ரகசியமாய் ஆகிப் போனதோ
நம் உறவு.... !

------சாம்பவி

எஸ்.ஜே சூர்யா காப்புரிமை கொண்டாடுவாரோ? ஒண்ணு இருந்தது ஆனா இல்லை வசனத்திற்காக?

இருப்பும் இல்லாதிருப்பும்
விருப்பம் இல்லா திருப்பம்
ஒன்றுமில்லை என ஆண் சொன்னால் ஒன்றுமே இல்லை எனப் பொருள்
ஒன்றுமில்லை எனப் பெண் சொன்னால் ஒன்றவில்லை எனப் பொருள்
ஒன்றுமில்லாமல் ஒன்றுவதா? ஒன்றாமல் ஒன்று மில்லாமல் போவதா?
ஒன்றேன்? நீதான் சற்று ஒன்றேன்!

ஒன்றத்தான் வந்தேனே மாமனாரே.... நீரும்
ஒற்றனாகி போனீரே மாமனாரே...
பற்றோட பற்ற வைத்த அடுப்பு..... என்னையும்
பற்றித்தான் போனதேனோ நெருப்பு......

-----சாம்பவி

அனிருத்தை எச்சரிச்சு வைக்கணும். ஹி ஹி

எச்சரித்து வைத்தாலும்
எச்சமெரிந்து வைதாலும்.....
எச்சமாகாது எம்முறவு.... !
என் மடி அவன் மெத்தை.... நான்
எண்மடி கட்டிய அத்தை.... !

----சாம்பவி

அடுப்பு ஊதி ஊதி களைத்தாள் அன்றைய மருமகள்
அடுக்காய் ஊதி ஊதி கொழுத்தாள் இன்றைய மருமகள்
பூனை உறங்கும் அடுப்புகள்
இல்லை இந்த வீட்டில் மருமகளே!

வசதியாய் தான் போயிற்று.... !
அசதியாய் நான் தூங்க
ஏஸி அறை இருக்கோ....
ஏசி அறை விடாதிருப்பீரன்றோ...
வேளைக்கொரு புடவை...
வேலைக்கொரு அகவை....
இது போறுமே....

-----சாம்பவி

ஏசி, ஏஸி என்று சொல்வதைக் கேட்டால்

எனக்கென்னவோ "நான் காத்துகிட்டிருப்பேன்" என்ற ஏசியன் பெயிண்ட் விளம்பரம் ஞாபகத்திற்கு வருது யோசித்த வேளையில்

வரி வரியாய் வரிச் சுமைகள்... !
வரிந்து கட்டி வரி கட்டி
வறிந்து போனது தான் மிச்சம்... !
வறியவரின் குரல் ஏறுமோ உச்சம்... !
----சாம்பவி

உச்சமிச்சமெச்சமெல்லாம்
வருமானத்திற்கன்றி
போகும் மானத்திற்கல்ல.

உருமானம் காக்க
வருமானம் வேண்டாமோ...
செக்கும் மாடாக (cheque)
செக்கு மாடனேன்... !

----சாம்பவி

வருமானம் தரும்
பகுமானம்
பரிமாணம் மாறியப்
பரிணாமம்

சிக்குமாடா
செக்கு மாடு

செக்கு மாடு சுற்றிச் சுற்றி வர
எண்ணை எடுத்தாயே
செக்குமாடாய் சுற்றிச் சுற்றி வருகிறேன்
என்னை எடுப்பாயா?

செக்கு மாடாய்
சுற்றுபவரிடம் ஜாக்கிரதையாய் இரு
செக் வைத்து
மாட்டி விடுவார்கள்


வருமானம் தரும்
பகுமானம்
பரிமாணம் மாறியப்
பரிணாமம்

சிக்குமாடா
செக்கு மாடு

செக்கு மாடு சுற்றிச் சுற்றி வர
எண்ணை எடுத்தாயே
செக்குமாடாய் சுற்றிச் சுற்றி வருகிறேன்
என்னை எடுப்பாயா?

செக்கு மாடாய்
சுற்றுபவரிடம் ஜாக்கிரதையாய் இரு
செக் வைத்து
மாட்டி விடுவார்கள்

ஏற்கனவே
சிக்கித்தான் சுற்றுகிறதே...
சிக்கும் சீக்குமாய்.... !

-----சாம்பவி

சிக்கென்று புக்ககம் வந்தவளை
சிக்கு புக்கு ரயில் என்று
சொல்லலாமா
பின்னே
அவள் பின்னே பாருங்கள்
எத்தனைப் பெட்டிகள்.

பெட்டிகள் வரவில்லையென்றால்
பெட்டிக்குள் அனுப்பிடுவீரே.... !
எல்லாம் ஒரு சேஃப்டிக்கு தான்
இந்த சேஃப்.... !

----சாம்பவி

ஓ!
சேஃப்டிக்கு பின்னால் வருவதால்
"சேஃப்டி பின்னோ"
ஆனால்
குத்துகிறதே
அப்புறம் என்ன சேஃப்டி?

புக்அகம் (நூலகம்) வந்தவளை
புக்ககம் வரச்சொன்னாலெப்படி.... !

---சாம்பவி

மாமனாரே என விளித்து
ஏஸி கேட்டு
வேளைக்கொரு புடவை கேட்டு
பின்னர்
புக்ககம் வராது
புக் அகம் சென்றால்
அகம் பிடித்தவள்
என்றல்லோ
அகம் சொல்லும்.

அகம் பிடிக்கவில்லை எனக்கு
அகம் தான் பிடிக்கவில்லை... ( ஏசுவதால்.... )

ஏஸி போட்டு
ஏசுவது மாமனாரோ
என் மாமன் ஆரோ....!
-----சாம்பவி

இல்லாள் அகத்திருக்க
இல்லாததொன்றில்லை
இல்லா அகத்திருக்க
இல்லாள் நகைத்திருக்க
வான்கூரை கீழ் வாழ்
வசதிக்கு ஒப்பாமோ
ஏசும் ஏஸியும்
எதேச்சதிகாரமும்?

இல்லா நகைக்கு
இல்லாள் நகைக்க*
இல்லாது போனதோ
உங்கள் நகை... !

---சாம்பவி

இல்லாள் நகைக்க
கொண்டோனுக்குண்டே நகை
நகைக்கும் இல்லாள்
பரவாயில்லை
அழுகிப் போன
அழுகை ஆயுதத்தை
எடுக்காத வரை.

சொற்சிலம்பம்...- பாகம் 1

ஓவிக்குப் பிடித்த (ஓவியைப் பிடித்தவல்ல) ஆவிக்கு காலில்லை என்கின்றார்களே உண்மையா?

- அமரன்

முக்காலும் உண்மை, மீதிக் கால்??. முழு உண்மையே இப்படி என்றால்??

ஆவி(ற்)க்குச் சுழிதான். ஓவிக்கு பிடித்திருக்கிறதே.(அ வை சுழித்தால் ஆ)அது கூட தலைக்கு அருகில் கையைச் சுழித்துதான் காட்டுவார்களாம்.

முக்கால் உண்மையுடன் அகரத்திற்கு கால் போட்டால் என்ன வரும். - அமரன்

அகரத்திற்கு கால்போட்டாலா??

ஆமாம் நம்பர் என்ன?

தமிழில் இரண்(டு)டாவது.. - அமரன்

அகரத்துக்கு தாமரையின் முக்கால் உண்மையின்கால் கால்போட்டால் ஆகரம்.
ஆ தமிழில் இரண்டாவது என நினைக்கின்றேன்.
அ உச்சரிப்பு ஒன்றாயின் ஆ உச்சரிப்பு இரண்டுதானே. - அமரன்

உமக்கு ஆகாரம் பத்தலைன்னு நினைக்கிறேன்
இதைத்தானே சொல்லி இருக்கிறேன். அ விற்கும் கால் கிடையாது... ஆ விற்கும் கால் கிடையாது. உயிரெழுத்துக்களுக்கு கால் கிடையாது. ஏனென்றால் உயிர் என்பது ஆவி.. என்ன ஓவி....


ஆவி(ற்)க்குச் சுழிதான். ஓவிக்கு பிடித்திருக்கிறதே.(அ வை சுழித்தால் ஆ)அது கூட தலைக்கு அருகில் கையைச் சுழித்துதான் காட்டுவார்களாம்.

ஆகரத்துக்கு இச் கொடுத்தால் என்ன வரும். - அமரன்

ஆ - பசு

ஆ கரத்திற்கு இச்சிட்டால்
நான்கிலொன்றுகிடைக்கலாம்.. ஒருக்கால்

உதை
பால்
சாணம்
கோமியம்

அப்போ ஆ கரத்திற்கு இச் இட்டால் சாவும் வரலாம் இல்லையா.- அமரன்

அது நம்ம கையில் இல்லை. ஆவின் காலில் இருக்கிறது..! - இதயம்

ஆச்சா?

அச்சா! (ஹிந்தி) - ஷீ-நிஷி

அச்சுதான் (தமிழ்) அசல்தான்..
அச்சு அசல்தான் நகல்..

ரசிக்கவைத்த ந(க்)கல்! - ஷீ-நிஷி

ஆச் "சா"

அமரன் அவர்களே

அகரம், ஆகாரம் , இகரம், ஈகாரம், உகரம், ஊகாரம், எகரம், ஏகாரம், ஐங்காரம், ஒகரம், ஓங்காரம், ஔகாரம்..

ஆகரம் என்பது தவறானப் பிரயோகம்.

அதே போய் மெய்யில் உயிரேறும் என்பது புணர்ச்சி விதி. இச் சுடன் ஆகாரம் ச்+ஆ = சா. ஆகாரத்துடன் இச் ஆ+ச் = ஆச்.

ஓவிக்குப் பிடித்த ஆவியை
இந்த மன்றில் பதித்த பாவியை
காசிக்குப் போய் காவியை
உடுக்க வைத்த மேதாவி யாரோ?. - ஓவியன்

ஒவ்வொரு மே மாதமும் அடுத்த வகுப்புக்குத் தாவுவதால் மாணவர்களை "மே"தாவி எனலாமே..

ஆமாம் ஓவியா காவி உடுத்தி காசி போனாரா இல்லை காசிக்குப் போய் காவி உடுத்தினாரா?

ஆமாம் நீங்களும் தாவியதால் தானே தாமரை ஆனீர்கள்!! - ஓவியன்

அவர் தாவியதால் தாமரை
தாம் அரையோ - அமரன்

தாவிய தா மரை
தா விய தாம் அரை
தாவியதாம் அரை
மற்றதெல்லாம் மறை

எங்கே கொண்டு சென்று போய் மறைப்பது செல்வன் அண்ணா? - ஓவியன்

மறை என்றால் வேதம் என்றும் அர்த்தம் உண்டு.

தா விய தாம் அரை தாவியபின் மற்றதெல்லாம் வேதம்.


தா = கொடு
விய = விஷம்
விஷம் கொடுத்த பாம்புதான்(தாம்) அரையில்(இடையில் அரைஞாணாக) தாவிய கதை தெரியாதா?

கூட்டு என்பது இனிமையானது எனத் தெரியும். அதில் தொக்கு சுவையா அல்லது தொகை(துவையல்) சுவையா எனத் தெரியலையே?
(கருத்தூண்டிய பேராசிரியர் நன்னனுக்கு நன்றி) - அமரன்

தொக்கு என்பது ஊறுகாய் வகை (தக்காளித் தொக்கு, மாங்காய்த் தொக்கு). தொக்கில் எண்ணெய் அதிகம் சேர்ப்பதால் இரண்டு மூன்று நாட்களுக்கு கெடாமல் இருக்கும்.

துவையல் என்பது சட்னி வகை (தேங்காய்த் துவையல்). சட்டென்று செய்ய முடிவதால் சட்னி. துவையல் அரைப்பார்கள்.

சமையலானந்தாவுக்குச் சவாலா?

அவரை(க்) கடலை(பருப்பு) போட்டு செய்யும் கூட்டில், தொக்கி நிற்கும் காரமும் மணமும் எவ்வளவு தொகை என்றாலும் தரலாமே!

யாரோ
கண்ணடித்ததால் அவள்
கண்ணடியில் உதித்த துளி
கண்ணாடியில் பட்டு-மீள
கண் நாடி எங்கும் தெறித்தது. - ஓவியன்

கண்ணடித்தது கண்டு
கண் நடித்தது
கண் அடி மை யழகில்
கண் அடிமை யானவன்
கண் அடியிட்டது
காதல்

காதலுக்குப்பின் கண் அடிமை யானவன் கண் அவன் ஆனானா? - சிவா.ஜி

கண் அடிமை ஆனவன்
கணவன் ஆகலாம்
மரியாதை இழந்து
"டா" சேர்த்து
கண்டவனும் ஆகலாம்

கண்ட அவனும் கனவன் தானே
கனவனை 'டா' போட்டு அழைப்பது அந்யோந்யத்தால் என்று பலர் நினைத்திருக்க நீங்கள் உண்மையை உடைத்து விட்டீரே - சிவா.ஜி

இதுக்குத்தான் வெயிட்டைக் குறைக்கச் சொல்றது.

வெறும் டா போட்டு அழைத்தால் பரவாயில்லை
அண்டா குண்டா தூக்கிப் போட்டு அழைக்கிறார்களே!

தாமரை அண்ணா உங்களிடம் ஒரு கேள்வி.

நிகழ் காலத்திற்கு விதிகளான ஆநின்று கின்று கிறு வின் படி

வந்தாநின்றான்
வருகின்றன்
வருகிறான்

எதிர்காலத்திற்கு ப்.வ் படி

வருவான்

ஆனால் சில பத்திரிக்கைகளில் கண்டது :

ஜூலை 2 மாநாட்டில் தலைவர் கலந்து கொள்கிறார். என்று போட்டிருக்கிறது..

இது எதிர்காலம் தானே? எப்படி கிறு வருகிறது? - ஆதவா

இது மக்களுக்கு ஒரு உற்சாகத்தையும் உத்வேகத்தையும் தர எழுதப்படுகிறது., அதை விடுங்கள்.. எப்ப கேட்டாலும் தலைவர் வருகிறார் வருகிறார் என்றுதான் சொல்லுவார்களே தவிர வருவதற்குள் விடிந்து விடுமே!

தலைவர் வருவார் என்றால் வரமாட்டார் என்று அர்த்தம். இதுக்கெல்லாம் தனி அகராதியே இருக்குங்க,

தலைவர் வந்தார் என்றால் தலைவர் இறந்துவிட்டார் / இல்லை என்று அர்த்தம்
தலைவர் வருகிறார் என்றால் தலைவர் வருவார் என்று அர்த்தம்
தலைவர் வருவார் என்றால் வரமாட்டார் என்று அர்த்தம்

அரசியலின் அரிச்சுவடி இது.

அரசியலை அரிக்கும் சுவடும் இதுதானோ - அமரன்

அரிக்கும் கை
பணம்தேடி
அரிக்கும் கால்
கார்கள் தேடி
அரிக்கும் உடல்
உடல் தேடி
அரிக்குமா மூளை
அட
அது இருந்தால்தானே!!!

பொதுமக்களுடன் சேர்த்து
அரிசியையும் ஒதுக்குகின்றார்கள்
அரசியல்வாதிகள்
வேறு வேறு இடத்தில்
அரியாசனம் கையில்
அறியா சனம்
கையில் இருப்பது
அறியா சனம்
--- அமரன்

அதெப்படி அமரா சேர்த்து பின் வேறு வேறு இடங்களில் ஒதுக்க முடியும்?

அரியாசனத்தின் கையில் அறியா சனமா இல்லை அறியா சனத்தின் கையில் அரியாசனமா?

எனக்கென்னவோ

அறியா சனத்தின் கையில்
அரியாசனம்
அவர்
அறியாமல் ஏறிவிடும்
நரி ஆசனம்.

அறியா சனம்
இருந்திடும் நிலைவரைக்கும்,
அரியாசனம்
எங்கள் தலைமுறைக்கே!
------ஷீ-நிஷி

அங்கேயும் ஒரு
முறைமாமன்
முறைத்துக் கொண்டே

அரியாசனம் பிடிக்க,
அரிசியும் சாசனம்...
அரியாசனம் பிடித்ததும்.,
ஆறிடும் சாசனம்...
இலவசங்கள் பார்த்து
இலவு காத்த கிளிகளாய்..,
மக்கள்.
வெடித்துப் பறந்தது பஞ்சே...
பஞ்சமல்ல...
-----அக்னி

அரிசி இலவசமா
யார் சொன்னது
எங்களது ஓட்டுகளும்
ஐந்தாண்டு வாழ்வும்
அங்கே அடகு வைக்கப்பட்டது
உங்களுக்குத் தெரியுமா?

வட்டி எப்படி?
கந்துவட்டிதானே?
-----அக்னி

கந்து வட்டிக்கு
வட்டமும் மாவட்டமும்
ஒன்றியத்துடன் ஒன்றி
வார்டு வார்டாய்
வலம்

வலம் வந்ததால்
கிடைத்தது
மாவட்டமோ?
மா வாட்டமோ?
-----அக்னி

மக்களுக்கு கிடைத்தது
மாவட்டம் தான்

ஆமாம் ஆமாம்
மிகப்பெரிய பூஜ்யம்

ராச்சியம் பூச்சியமானது இப்படித்தானோ - அமரன்

பூச்சியமானதா என்று தெரியாது!
மக்களை அரிக்கும்
பூச்சியானது!
- ஷீ-நிஷி

கரையான் என்று
சொல்லமென்றிருந்தேன்
ஆணி வேரையே
அரித்து விடுவதால்
ஆனால் இரும்பையே அரித்துவிடும்
இவற்றை
என்னவென்று சொல்ல!

கரையான்
அவன் கரையான் தான்!
தன் சொத்தை
கரைத்துகொள்ளாமல்,
எல்லாவற்றையும்
கரைப்பான்!
அரசில் வியாதி!
-----ஷீ-நிஷி

கரைப்பான் என்று சொல்லலாமோ?

கரைப்பான்கள்
கரைப்பட்டுக்கள்
கறைப்படும்
அரசியல்...
----அக்னி

கறையின்
கரையில் கரைப்பான்.
கரைவார் கரைவார்
கரையோர் கரையின்
கரைந்தோர் பதவி!

கறையின் - அழுக்கு, வண்ணம்
கரையில் - வேட்டியின் ஓரம் ..

அதாங்க கறைபடிந்த கட்சியின் கரை வேட்டிக்காரங்க

கரைப்பான். - கரைப்பார்கள், பேசியே மனதை மாற்றுவார்கள்
கரைவார் கரைவார் - மனம் மாறுபவர்கள் மாறிவிடலாம் அவர்களுக்கு ஒன்றும் கிடைக்காது

கரையோர் கரையின் -- மனம் மாறத்வர்கள் விட்டுச் செல்லுவது போலிருந்தால்

கரைந்தோர் பதவி! - அழைத்துப் பதவி கொடுப்பார்கள்

என்னங்க சித்தர் பாடலே பரவாயில்லைன்னு தோணுதா!!!

சித்தர் பாடலே பாரவாயில்லை என்றுபடவிலை..சித்தரோ என நினைத்தேன்..பாடம் சொல்லித்தருவதுக்கு நன்றிகள் கோடி. தொடருமா..., - அமரன்

மா தொடராது.. வாழைதான்.. வாழையடி வாழையாய்..

வாழையும் மாவுமுமிருக்கே பலா எங்கென விழித்திருக்கும் மனம்..

முக்கனியாய் ஏன் வாழை, மா, பலா மட்டும் சொன்னார்கள்? அதிலென்ன சிறப்பு? ஏன்?

இந்த மூன்று கனிகளுமே வருடத்தின் முழு நாட்களிலும் கிடைக்கக் கூடியன......

மற்றவை அந்த அந்த காலத்திற்கு மட்டும் உரியவை.....
--ஓவியன்

மாம்பழ சீசன் கோடைக்காலம் மட்டுமே!
வருடத்தில் எல்லா நாட்களுமே முழு நாட்கள்தான்
அரை நாட்கள் கால் நாட்களேல்லாம் கிடையாது

மா.பலா,வாழை...இவை மூன்றும்தான் அந்த இலக்கியகாலத்தில் இங்கே கிடைத்துக்கொண்டிருந்த பழங்களில் அதிக சுவையுள்ளதாக இருந்ததாலா..?
---சிவா.ஜி

வாழை மருத நிலத்தைக் குறிக்க..
மா முல்லை நிலத்தைக் குறிக்க..
பலா குறிஞ்சி நிலத்தைக் குறிக்க..

அப்போ நெய்தலையும் பாலையையும் குறிக்க.........?- ஓவியன்

நெய்தலின் கனி − மீன்
பாலையில் கனியும் இல்லை கன்னியும் இல்லை..(குறிஞ்சியும் முல்லையும் முறைமையிற் திரிந்து பாலை என்பதோர் படிவம் கொள்ளும்)

இல்லையே இங்கே பாலையில் கனியும் இருக்கு, கன்னியும் இருக்கே.....!- ஓவியன்

கனி, கன்னி, பார்த்துக் கணி.. இல்லைன்னா கண்ணிதான்

கன்னி யை சரியா கணிக்கா விட்டால் கன்னம் கன்னி கனியாயிடும்.
சரியா கணிச்சு கண்ணி வச்சா கன்னி கனிந்து கண்ணாளம் ஆகும்

அப்போ கண்ணாளத்த்துக்கும் கன்னம் கன்னியாகிறதும் கணிக்கிற விதத்திலே தான் கனிந்து வரும் எங்கிறீங்க............!

அப்ப சரி..........
ஆனா நம்மளுக்கு எப்போதும் சரியாண கணிப்பு, கனிந்து வாறது கானல் நீராச்சே........!
----ஓவியன்

கணிப்பு தவறுகிறது என்றால் கவனிப்பு தவறுகிறது என்று அர்த்தம்.
கவனிப்பு தவறுகிறது என்றால்.. காதல் வருகிறதென்று அர்த்தம்..
காதல் வருகிறதென்றால்.... காலம் வருகிறதென்று அர்த்தம்..(அது நல்லதா கெட்டதான்னு தெரியாது)

திரிந்தது பாலை
திரிகின்றது பால்(பருவம்)
திரிவது பால் (பால் கெட்டுப் போவதை திரிந்து போதல் என்பர்)
திரி திரிப்பதால் உண்டானால்
இராத்திரி எப்படி உண்டாகிறது..?

இரவியார் கண்காணிப்பு அகன்றவுடன்
இருளும் குளுமையும் என
இரண்டு இழைகள் இணைந்ததால்
ஏற்படும் திரி − இராத்திரி!
----இளசு

ஈரிழை இணைந்தால் இரவா?
ஈரேழை இணைந்தால் ஒளியல்லவா?

ஈரமிட்டது எண்ணெயாய் இருப்பின்
இழைகள் ஒளிரும்..
வெறும் கண்ணீராய் இருந்தால்
இருளே நிரந்தரம்..!
----இளசு

ஏழைகளின் கண்ணீர் எரிக்கும்
ஆனால் இந்த
அரசியல்வாதிகள் புத்திசாலிகள்
தள்ளி நின்று
குளிர் காய்ந்து விடுகிறார்கள்...


எள்+நெய் = எண்ணெய்..

நல்லெண்ணெய் தான் தமிழ்நாட்டின் முதலெண்ணெய்.
நல்லெண்ணம் தான் தமிழனின் முதலெண்ண*ம்.

எண்ணெயில் விளக்கெரிய வேண்டும்

கண்+நீர் = கண்ணீர் மாசகற்றும்
கள்+நீர் = கண்ணீர் மாசாகும்

ஏழைகளின் கண்ணீர் எரிக்கும்,
ஆனால் கண்ணீர் வரவும்
தண்ணீர் இல்லாததால்.....
கண்களுக்குள்ளேயே கண்ணீர்
காய்ந்தல்லவா விடுகிறது........?
-----ஓவியன்

ஏழைகளின் கண்ணீரும்,
ஊற்றினுள்ளேயே காய்ந்துபோவதால்தான்,
பூமி.., தன்னில் பெரும்பகுதியை,
உப்புநீரால் நிறைத்து,
குறித்துக் காட்டுகின்றதோ..?
- ----அக்னி

உப்பு நீரால் கண் எரிகிறது
ஆனால் கண் எரிந்தால்
கண்ணீர் வருகிறதே
உப்பு நீராக...........!
------ஓவியன்

கடலில் மீன்கள்.
உண்மை
ஆனால்
மீனில் கடலிங்கு
ஆம்
அவள் அழுகிறாள்

கடலில் மீன்
அது யதார்த்தம்.
மீன்களில் கடல்
அது கவிதை..!!
அந்த
மீன் கொண்ட
கடலிலும் உண்டோ மீன்...??
என்றால் அது குறும்பா...??

------ஓவியன்

குறும் பா(திருக்குறள்)
காட்டாக் குறும்பா?

மீனில் கடல்பார்த்து
துடிக்கும் மீன்களாக
ஆண்கள்..

ஆண் மீன்களிலும்
கடலாக
கடன்பெற்ற கடல்..!
------அமரன்

(நீத்தார்)கடன் தீர்ப்பதும்
கடனே என இருக்கும்
கடலில்தானே!

நீந்தினோர் பலர்
(பிறவிக்) கடன் தீர்த்ததும்
கடல்தானே...!

நீந்துவோர் பலர்
(பட்ட) கடன் தீர்ப்பதும்
கடல்தானே...!

கடனே என இருக்கும்
கடலுக்கு எத்தனை கடன்
நிலுவையாக.


சிலுவைகள் விளைவோ..!
------அம்ரன்

அறைந்த சிலுவையில்
உறைந்த துளிகள்
உப்புக்கரித்தன
கடலின் கடனோ!

கண்ணீர்
கடலிடம் பட்ட
கடன் தானோ
உப்பு.....??
-----ஓவியன்

உறையாதிருக்க
போடுகின்றனர் உப்பு
உப்பிருந்தும்
உறைகிறதே ஏனப்பு?

உறைக்க உரைக்கலாமே..!

------அமரன்

உறைக்க நீர்
பாவிப்பதுண்டோ மிளகாய்பொடி..?

மாறாக
கறிக்கு முன் நின்று
உரைப்பது மட்டும் தான்
உம் கடனோ...??
உரைத்தால்
அதுவும் உறைக்குமோ...?

-----ஓவியன்

உப்பு உறைக்க
காரமும் உறைக்க
நானென்ன உரைக்க?
உரைக்கும் உறைக்கும்
தள்ளாடி
குத்திய முத்திரைகளின்
கருமை
முகத்தில் பூசியது கருமை!!

ஆதவன் உதிக்கவேண்டும்...
தாமரை மலரவேண்டும்..
அப்போதான் சாயம் வெளுக்கும்...!
----அமரன்

அமரசாயமெனில்
அது அமரமானதன்றோ
வெளுக்குமா...
வெள்ளை வெளுத்தாலும் வெள்ளையே!
-----சிவா.ஜி

உரை - சொற்பொழிவு! தலைவர் உரையாற்றுகிறார் என்று படித்ததில்லையா?
உறை - என்பது தற்போது பாக்கெட் சாராயத்தின் செல்லப் பெயர்.. அல்லது கவர் என்றும் கொள்ளலாம். (சிலேடையப்பா)

ஆக தலைவர்கள் ஆற்றும் உரையிலும், அவர்கள் கொடுக்கும் சாராயத்திற்கும் மயங்கி அவர்களின் சின்னங்களில் கரிய மை கொண்டு முத்திரை குத்தி அவர்களை பதவிகளில் அமர்த்தி விடுகின்றனர். ஆனால் அதனால் அவர்களின் வாழ்வில் ஒளி தோன்றுவதில்லை. தகுதியில்லாதோரை பதவியில் அமர்த்துவதின் மூலம் அவர்கள் முகத்தில் அவர்களே கரியை பூசிக் கொள்கிறார்கள்,

வெள்ளை வெளுத்தால்தான்
வெள்ளை
இல்லையெனில் போய்விடும்
கொள்ளை
சலவை -
கறைகளை அண்டவிடாமல்
காக்கும்
சத்திய சோதனை..
உன்னை அடிக்கடி துவைத்துக் கொள்
அதாவது
சோத்னைக்கு உள்ளாக்கிக் கொள்
இல்லையெனில்
நீ கெட்டுப் போய்விட்டது
உனக்கே தெரியாது.

சலவை
சத்திய சோதனை
மூளைக்கும் 'முடுக்கு'க்கும்..

கரையில்லா கறைகளுடன்
கரைகள் செய்யும் சலவை
சத்தியத்துக்கு சோதனை...!
------அமரன்

கரைகள் செய்யும் சலவை - மூளைச் சலவை
மற்றபடி அவர்களின்
இன்றைய கவலை
சலவை அல்ல
கலவை(கூட்டணி)

கலவைகள் பல
குருவி தலைக் கல்லாக..
தலைகளுக்கு
குறி தப்பாக் கல்லாக..

எப்படி ஆடினாலும்
ஆட்டத்தின் முடிவில்
கல்லின் தலையில்
குருவிகள்தானே..!
-----அமரன்

கல்லின் தலையில்
குருவிகளல்ல
காக்கைகளின் எச்சம்

குருவி இருக்ககூட
அருகதையற்றைவையோ
கல்லுகள்...!

எத்திப்பிளைக்கும் காக்கை
எச்சமிட்டு
கற்றுக்கொடுத்தாலும்
கற்றுகொள்வார்தான் யாருமில்லை..!
-------------------------------------------

கொல்லும் தனிமைத் தருணங்களை
கொல்லும் தருணங்களில்-தருணங்கள்
சொல்லும் மரண வாக்குமூலங்களே
மெல்லக் கவியா(க்)கின்றனவாமே.

மெய்யாகவே மெய்யா இது.
இல்லை மெய்யைபோல பொய்யா
அல்லது மெய்யுடன் உயிர்கலந்த நிலையா..!

----- அமரன்

எழுத்திலக்கணம்

உயிர்
மெய்
உயிர்மெய்
ஆய்தம்
ஆகாரக்குறுக்கம்
ஐகாரக்குறுக்கம்
ஔகாரகுறுக்கம்
ஆய்தக்குறுக்கம்
மகரக்குறுக்கம்
உயிரெளபெடை
குற்றியலுகரம்
குற்றியலிகரம்
ஒற்றெளபடை

உயிர்
மெய் --- உண்மை உயிராகும்
உயிர்மெய் --- உண்மை எனப்படும் உயிர்சக்தியே
ஆய்தம் --- ஆயுதமாகும்
ஆகாரக் குறுக்கம் --- அளவோடு உண்பது
ஐகாரக் குறுக்கம் --- ஐம்புலனடக்கம்
ஔகாரக்குறுக்கம் --- ஔடதம் (மருந்துகள்) உண்ணலைக் குறைப்பது
ஆய்தக் குறுக்கம் ---- ஆயுதக்குறைப்பு
மகரக்குறுக்கம் ---- மனக்கட்டுப்பாடு
உயிரெளபெடை ---- உயிர் நீளும் வழி.. நீண்ட நாள் வாழும் வழி,
குற்றியலுகரம் ---- இவற்றில் உறுதி குறைவது
குற்றியலிகரம் ---- பலநாள் காத்து இறுதியில் கைவிடுவது
ஒற்றெளபெடை --- என்ற ஒன்றே(ஒற்று) இன்று வரை அடுக்காய், அடுத்தடுத்து நீண்டு வந்து கொண்டிருக்கிறது

கீரையாமணம்.

பொன்னாங்கண்ணி
பசலை

முசுமுசுக்கை
தூதுவளை

வல்லாரை
சிறுகீரை
முருங்கை
அறுகீரை

கரிசலாங்கண்ணி
குப்பைமேனி
ஆரை
அகத்திக்கீரை

வெந்தயக்கீரை
மணத்தக்காளி
இறுதியில்
கறிவேப்பிலை

புளிச்சங்கீரை
புதினாக் கீரை

பொன்னிறம் கொண்டவளுக் அழகிய கண்கொண்ட சீதை - பொன்னாங்கண்ணி

பசலை - கணவனைப் பிரிந்ததினால் பிரிவுத்துயரில் பசலை படர்ந்தவளாய் இருந்தாள்.

குரங்காகிய (முசு) கைகளின் மூலமாய் தூதாக வளை(வளையம் - ரிங் - மோதிரம்) வந்தது.

வல்லாரை - அசுரர்களை;

சிறுகீரை - எளியவர்களான வானரங்கள் மற்றும் ராம லட்சுமணர்கள்

முருங்கை - தம்முடைய அழகிய கைகளினால்

அறுகீரை - அழித்தார்கள்..

கரிசலாங்கண்ணி - கரிய நிறமும் அழகிய கண்ணும் கொண்ட ராமன்,

குப்பைமேனி - மக்கள் மனதில் எழக்கூடிய சந்தேகங்கள் என்னும் குப்பைகளை எண்ணி,

ஆரை - ஆரணங்கை

அகத்திக்கீரை - உளச்சுத்தி காட்ட உடலைத் தீக்கிரையாகச் சொன்னான்.

வெந்தயக்கீரை - வெந்த தங்கம் - புடம் போட்ட தங்கம் போட்ட வெளிப்பட்ட அவள் ,

மணத்தக்காளி - புகழாகிய நறுமணத்தை தக்க வைத்துக் கொண்டவளானாள்.

கறிவேப்பிலை - இறுதியில் அவள் கறிவேப்பிலையாய் வெறும் மணப் பொருளாய் மட்டுமே மாறிப்போனாள்.. ஓருரிமையும் இல்லாமல் போயிற்றவளுக்கு.,

புளிச்சங் கீரை - இது சொல்லிச் சொல்லிப் புளித்துப் போன கதை

புதினாக்கீரை - இன்னும் ஒரு புதிய வடிவில்

ஓ பார்வதி!

அஞ்சுதலையில் எது
ஆறுதலை
அஞ்சுகையை நீ ஆக்க
அவனோ
ஆறவனை
அக்னியிடம் கொடுத்து
சக்களத்திக்கு
சன்மானமாய் அனுப்பிவிட்டானே
குடுமியாண்டவன்
முக்கண்ணனை
காயவைத்தாட்டி
எடுப்பீரே
எண்ணெய்!

பரமனுக்கு ஐந்துதலைகள் உண்டு.. அந்த ஐந்து தலைகளுக்கும் மேலே கண்ணுக்குத் தெரியாத ஆறாவது முகம் அதோமுகம். அதோ கதி என்றால் யாருக்கும் தெரியாத கதி அல்லவா..

ஆறாவது தலை.. அதே சமயம் கங்கை ஆறு எந்த தலையில் அமர்ந்தது என்ற கேள்வியும் உண்டு.. சங்கரன் தலையில் எத்தலையில் அமர்ந்தது கங்கை என்ற கேள்வி..

ஐந்து கை கொண்ட விநாயகனை பார்வதி உடல் அழுக்கிலிருந்து திரட்டிப் படைக்கிறாள். ஆனால் திரிபுரமெரித்தவனோ ஆறாய் (ஆறு மக்களாய்) முருகனை நெற்றிக்கண்ணில் இருந்து பிறப்பித்து அக்னியிடம் கொடுத்து கங்கையில் விடச் சொல்கிறான். கங்கையில் இருந்து பிறந்ததால் காங்கேயன் என்ற பெயர் இருவருக்கு உண்டு. ஒன்று முருகன்.. இன்னொன்று பீஷ்மன்.,

கங்கையின் கணவன் சங்கரன் என்கிறோம். கங்கை சங்கரனின் மகள் என்கிறது வட இந்தியப் புராணங்கள் சில. சந்தனு கங்கையை மணந்து அஷ்ட திக் வசுக்களை பிள்ளையாய் பெற்றான்.. அவற்றில் பீஷ்மனைத் தவிர மற்றோர் பிறந்த உடனேயே கங்கையால் கொள்ளப்பட்டனர் என்பது மகாபாரதக்கதை. எனில் கங்கையை எப்படி ஈசனுக்கு மனைவியாக்குவது.. ஒரு ஆண் தன் தலையில் வைத்தாடுவது இருவரைத்தான்.. மனைவி, மகள்..

அதே போல் முருகன் தம்பியல்ல அண்ணன். புராணத்தை சற்றே உற்று நோக்கினால் புரியும். பரமன் பார்வதியை மணக்கும் முன்னரே காம தகனம் நடந்த உடனே நெற்றிக்கண் திறந்து முருகனைப் படைத்து விடுகிறான். ஆனால் பார்வதியோ மணத்திற்குப் பின்னால் கைலாயத்தில் வாழும் காலத்தில் ஆனைமுகனை படைக்கிறாள்.. அப்படியானால் யார் அண்ணன், இது வடவிந்தியாவில் உண்டு. தென்னிந்தியாவில் விநாயகன் அண்ணனாகச் சொல்லப்படுகிறான்.

காய வைப்பது என்றால் நீரில்லாமல் ஆக்குவது.. கங்கையை நீக்குவது தானே பரமனை நீரில்லாமல் ஆக்க வழி.. சடைமுடிகளுடன் கூடிய தேங்காய் எப்பொழுதுமே சிவனுடன் ஒப்பிடப்படுகிறது..

அவனிற்கும் கொண்டை.. அதற்கும் கொண்டை.. அவனுக்கும் வெள்ளைமணம் அதிலும் வெள்ளைப் பருப்பு. அவனிலும் கங்கை எனும் நீர்.. அதிலும் தெங்கிளநீர், அவனுக்கும் முக்கண், தேங்காய்க்கும் முக்கண்.. தென்னையும் உயரமாய் வளரும் அவனும் அடிமுடி காணாமல் வளருவான். அவன் தலையில் தாழை.. தென்னைமரம் தலையில் ஓலை..

எண்ணதான் காயவைத்தாலும் தேங்காயில் ஈரப்பசை போவதில்லை.. எண்ணெயாய் அதற்குள் இரண்டறக் கலந்தது அது. அது போல என்னதான் நிந்தித்தாலும் பரமனின் மனதில் கருணை ஒட்டிக் கொண்டே இருக்கும்.. அவன் உள்ளமே வரண்டு போயிருந்தால் விடா முயற்சியுடன் அடிமுடி தெரியா அவனை பிடித்தாட்டிக் கருணை பெறு என்பது தான் கரு.